బెంగాల్లో కాంగ్రెస్ కార్యకర్త హత్య..
టీఎంసీపై రాహుల్ ధ్వజం..
ఎన్నికల నేపథ్యంలో పశ్చిమ బెంగాల్లో రాజకీయ ఉద్రిక్తతలు పెరుగుతున్నాయి. అసన్సోల్లో కాంగ్రెస్ పార్టీ మద్దతుదారుడు దేబ్దీప్ ఛటర్జీ హత్యకు గురైన ఘటనపై లోక్సభ ప్రతిపక్ష నేత రాహుల్ గాంధీ తీవ్రంగా స్పందించారు. ఘటనను ఖండిస్తూ అధికార తృణమూల్ కాంగ్రెస్ పార్టీపై తీవ్ర ఆరోపణలు చేశారు.
“బెంగాల్లో ప్రజాస్వామ్యం లేదు”
“పశ్చిమ బెంగాల్లో ప్రజాస్వామ్యం లేదు. రాష్ట్రంలో టీఎంసీ భయోత్పాత పాలన కొనసాగుతోంది. ఓటు వేసిన తర్వాత ప్రజలను బెదిరించడం, దాడులు చేయడం అక్కడ సాధారణమైంది,” అని రాహుల్ గాంధీ సోషల్ మీడియా వేదికగా స్పందించారు. “భారతదేశ అహింసా సంప్రదాయాన్ని మలినం చేసే ఈ రాజకీయాలకు మేం తలొగ్గం. న్యాయం జరిగే వరకు పోరాటం కొనసాగుతుంది,” అని స్పష్టం చేశారు.
कांग्रेस के कार्यकर्ता देबदीप चटर्जी की चुनाव बाद TMC से जुड़े गुंडों द्वारा की गई हत्या बेहद निंदनीय है। शोकाकुल परिवार के प्रति मेरी गहरी संवेदनाएँ।
— Rahul Gandhi (@RahulGandhi) April 26, 2026
पश्चिम बंगाल में आज लोकतंत्र नहीं, TMC का गुंडा राज चल रहा है। वोट के बाद विरोधी आवाज़ों को डराना, मारना, मिटाना - यही TMC का… https://t.co/kQn4T9deL0
అసలేం జరిగింది?
అసన్సోల్ నార్త్ నియోజకవర్గంలో ఏప్రిల్ 25న జరిగిన ఘటన ఇది. కాంగ్రెస్ అభ్యర్థి ప్రసేన్జిత్ పుయిటాండి సన్నిహిత కార్యకర్త దేబ్దీప్ ఛటర్జీపై కొందరు వ్యక్తులు దాడి చేశారు. ఒక కార్యక్రమం ముగించుకుని ఇంటికి వెళ్తుండగా భార్య, చిన్న కుమారుడి కళ్లముందే హత్య చేసినట్లు సమాచారం. ఈ ఘటన స్థానికంగా తీవ్ర కలకలం రేపింది.
టీఎంసీపై కాంగ్రెస్ ఆరోపణలు..
ఈ హత్య వెనుక తృణమూల్ కాంగ్రెస్ హస్తం ఉందని కాంగ్రెస్ ఆరోపించింది. అసన్సోల్ నార్త్ నియోజకవర్గం టీఎంసీకి బలమైన కోటగా ఉన్న నేపథ్యంలో ఈ ఘటన మరింత ప్రాధాన్యత సంతరించుకుంది. ఈ ఘటనతో రాష్ట్రంలో శాంతిభద్రతలు పూర్తిగా క్షీణించాయని, ప్రతిపక్ష కార్యకర్తల భద్రతపై సందేహాలు వ్యక్తమవుతున్నాయని కాంగ్రెస్ రాష్ట్ర విభాగం పేర్కొంది.
ఎన్నికల తర్వాత హింసపై ఆందోళన..
ఏప్రిల్ 23న జరిగిన తొలి దశ పోలింగ్ తర్వాత బెంగాల్లో అనేక హింసాత్మక ఘటనలు చోటుచేసుకున్నాయి. ప్రతిపక్ష అభ్యర్థులపై దాడులు, ఘర్షణలు, నాటు బాంబు పేలుళ్లు..ఇలాంటి ఘటనలు వరుసగా వెలుగులోకి రావడంతో ఎన్నికల భద్రతపై ప్రశ్నలు తలెత్తుతున్నాయి.
మమత, మోదీలపై రాహుల్ విమర్శలు..
హత్య ఘటన నేపథ్యంలో రాహుల్ గాంధీ, పశ్చిమ బెంగాల్ ముఖ్యమంత్రి మమత బెనర్జీ, ప్రధాని మోదీ ఇద్దరినీ లక్ష్యంగా చేసుకున్నారు. “ఈ ఇద్దరు నాయకులు పేదల సమస్యల కంటే అధికారంపైనే ఎక్కువ దృష్టి పెడుతున్నారు. ప్రజల కంటే రాజకీయ ప్రయోజనాలకే ప్రాధాన్యం ఇస్తున్నారు,” అని ఆరోపించారు.
కాంగ్రెస్ ఒంటరి పోటీ..
దాదాపు 20 ఏళ్ల తర్వాత కాంగ్రెస్ ఈసారి బెంగాల్ ఎన్నికల్లో ఒంటరిగా పోటీ చేస్తోంది. రాష్ట్రంలో ప్రజాస్వామ్యం పూర్తిగా దెబ్బతింది. టీఎంసీ అరాచక పాలన కొనసాగుతోందని కాంగ్రెస్ ఆరోపిస్తోంది.
న్యాయం కావాలి..
దేబ్దీప్ ఛటర్జీని హత్య చేసిన వారిని వెంటనే అరెస్టు చేసి, కఠిన శిక్ష విధించాలని కాంగ్రెస్ డిమాండ్ చేసింది. “ఇలాంటి ప్రజా వ్యతిరేక శక్తుల చేతిలో దేశం నాశనం కావడానికి మేం అనుమతించము,” అని పార్టీ స్పష్టం చేసింది.
బెంగాల్లో ఎన్నికల వేళ చోటుచేసుకున్న ఈ హత్య రాజకీయంగా పెద్ద దుమారాన్ని రేపింది. ప్రజాస్వామ్యం, భద్రత, ఎన్నికల పారదర్శకతపై కొత్త ప్రశ్నలను లేవనెత్తింది. ఈ ఘటనపై ప్రభుత్వం, ఎన్నికల సంఘం ఎలా స్పందిస్తాయన్నది కీలకంగా మారింది.
