పవన్ ’పోక్సో‘ రాజకీయం?

సొంత రాష్ట్రమైన ఆంధ్రప్రదేశ్‌లో మహిళలు, చిన్నారులపై జరుగుతున్న నేరాలు, శాంతిభద్రతల సమస్యలపై పవన్ కల్యాణ్ ఇదే స్థాయి చొరవ చూపించకపోవడం చర్చనీయాంశమైంది. ఏపీ అసెంబ్లీ నివేదికల ప్రకారం రాష్ట్రవ్యాప్తంగా 3,928 మంది మహిళలు, 1,730 మంది మైనర్ బాలికలు అదృశ్యమైనట్లు కేసులు నమోదయ్యాయి. ఇంత తీవ్రమైన గణాంకాలు భయపెడుతున్నా, ఏపీ ప్రభుత్వంలో కీలక భాగస్వామిగా ఉన్న పవన్ కల్యాణ్ స్థానిక పోక్సో కేసులపై కానీ, మహిళల అదృశ్యాలపై కానీ కనీసం ఒక్క సమీక్ష కూడా నిర్వహించకపోవడంపై ప్రతిపక్షాలు మరియు విమర్శకులు ఆయన వైఖరిని తప్పుబడుతున్నారు.

2024 ఎన్నికలకు ముందు ఏపీలో సుమారు 30 వేల మంది మహిళలు, బాలికలు మిస్ అయ్యారంటూ వాలంటీర్ వ్యవస్థపై పవన్ కల్యాణ్ తీవ్ర ఆరోపణలు చేశారు. అయితే అధికారంలోకి వచ్చిన తర్వాత ఆ 30 వేల మంది మిస్సింగ్ మిస్టరీని ఛేదించడానికి ఆయన ఎలాంటి ప్రత్యేక శ్రద్ధ చూపలేదనే విమర్శ ఉంది. అంతేకాకుండా, గతంలో తాను తీవ్రంగా పోరాడిన సుగాలి ప్రీతి కేసులో బాధిత కుటుంబానికి న్యాయం చేస్తానని హామీ ఇచ్చినప్పటికీ ఇప్పటివరకు చెప్పుకోదగ్గ పురోగతి లేదు. అలాగే తునిలో రెండేళ్ల పాప జాను అదృశ్యమైన ఘటనపై గానీ, రాష్ట్రంలో జరిగిన ఇతర అత్యాచార ఉదంతాలపై గానీ ఆయన మౌనం వహించడం డ్యూయల్ స్టాండ్స్ (ద్వంద్వ వైఖరి) కు అద్దం పడుతోందని విశ్లేషకులు భావిస్తున్నారు.

ఈ పరిణామాలన్నింటి వెనుక తెలంగాణలో జనసేన పార్టీని బలోపేతం చేయాలనే పక్కా రాజకీయ వ్యూహం దాగి ఉందనే అభిప్రాయాలు వ్యక్తమవుతున్నాయి. తెలంగాణలో పొలిటికల్ స్పేస్ క్రియేట్ చేసుకోవడానికి, అక్కడి ప్రభుత్వ విధానాలను ప్రశ్నించడం ద్వారా తన ఉనికిని చాటుకోవాలని పవన్ కల్యాణ్ చూస్తున్నారు. అయితే, పొరుగు రాష్ట్ర మహిళల భద్రత గురించి ఆందోళన చెందడం మంచిదే అయినప్పటికీ, సొంత రాష్ట్రంలో వేలాది మంది మహిళలు, బాలికలు అదృశ్యమవుతున్న తరుణంలో వారి రక్షణ బాధ్యతను కూడా ఆయన సమానంగా నెరవేర్చాలనే ప్రజా డిమాండ్స్ ఇప్పుడు తెరపైకి వస్తున్నాయి.