గోపి,రాధలను కృష్ణమ్మ కలిపితే..జగన్, బాబులను మోదీ కలిపారా?
మోదీ కోసం ఒక్కటైన ఏపీ బద్ధ శత్రువులు. జగన్, చంద్రబాబుల అరుదైన ఏకాభిప్రాయం.
’నేనీ దరిని.. నువ్వా దరిని.. కృష్ణమ్మ కలిపింది ఇద్దరినీ‘.. అంటూ ’బంగారు బొమ్మలు‘ సినిమాలో గోపి (ANR), రాధ (మంజుల)లను ఆ కృష్ణమ్మ ఏకం చేసినట్లు.. ఇప్పుడు ఆంధ్రప్రదేశ్ రాజకీయాల్లో ఉత్తర-దక్షిణ ధ్రువాల్లాంటి నారా చంద్రబాబు నాయుడు, వైఎస్ జగన్ మోహన్ రెడ్డిలను ఢిల్లీలోని ’మోదీ మార్క్‘ రాజకీయం ఒక్కటి చేసింది. ఏప్రిల్ 17, 2026న లోక్సభలో 131వ రాజ్యాంగ సవరణ బిల్లు వీగిపోయిన ఉదంతం.. ఎప్పటికీ కలవవు అనుకున్న ఈ ఇద్దరు బద్ధ శత్రువులను అనూహ్యంగా ఒకే గొడుగు కిందకు చేర్చింది. మహిళా రిజర్వేషన్లు, నియోజకవర్గాల పునర్విభజన (Delimitation) వంటి కీలక నిర్ణయాలను కాంగ్రెస్, డీఎంకే కూటమి పార్టీలు పార్లమెంట్ లో అడ్డుకోవడాన్ని ఇద్దరు నేతలూ ఏకకంఠంతో ఖండించడం విశేషం. రాష్ట్రంలో అధికారం కోసం ’నువ్వా-నేనా‘ అంటూ కత్తులు నూరుతున్నా, ఢిల్లీ పీఠం వద్ద మాత్రం ప్రధాని మోదీ ఎజెండాకు జగన్, చంద్రబాబులిద్దరూ డబుల్ ఇంజిన్ లా అండగా నిలవడం ఇప్పుడు ఆంధ్రప్రదేశ్, జాతీయ స్థాయిలో హాట్ టాపిక్గా మారింది.
బిల్లు వీగిపోవడంపై జగన్ నిప్పులు.. ప్రతిపక్షాల తీరుపై ఆగ్రహం
లోక్సభలో 131వ రాజ్యాంగ సవరణ బిల్లు వీగిపోయిన వెంటనే స్పందించిన వైఎస్ జగన్ మోహన్ రెడ్డి, జాతీయ స్థాయి ప్రతిపక్షాల తీరును తీవ్రంగా ఎండగట్టారు. బిల్లును అడ్డుకున్న పార్టీలు సాధించిందేమిటి? అని ప్రశ్నిస్తూ, వారి నిర్ణయం వల్ల చారిత్రాత్మక మహిళా రిజర్వేషన్లకు గండిపడిందని విమర్శలు గుప్పించారు. కేవలం రాజకీయ పంతాల కోసం మహిళా సాధికారతను అడ్డుకోవడం సరికాదని, ఈ నిర్ణయం వల్ల మహిళా లోకానికి జరగాల్సిన న్యాయం మరోసారి వాయిదా పడిందని జగన్ నిప్పులు చెరిగారు. తన పార్టీ సిద్ధాంత పరంగా ఈ బిల్లుకు కట్టుబడి ఉందని స్పష్టం చేస్తూ, విపక్షాల వైఖరిని బాధ్యతారాహిత్యంగా అభివర్ణించారు.
దక్షిణాది రాష్ట్రాల గొంతుకగా... మోదీకి బేషరతు మద్దతు
ఈ సవరణ వీగిపోవడం దక్షిణాది రాష్ట్రాలకు శాపంగా మారుతుందని జగన్ లోతుగా విశ్లేషించారు. ముఖ్యంగా జనాభా నియంత్రణను సమర్థవంతంగా పాటించిన దక్షిణాది రాష్ట్రాలకు, భవిష్యత్తులో నియోజకవర్గాల పునర్విభజన (Delimitation) వల్ల రాజకీయ ప్రాతినిధ్యం తగ్గిపోయే ప్రమాదం ఉందని ఆయన తనదైన శైలిలో ఆందోళన వ్యక్తం చేశారు. దానిని అరికట్టేలా కేంద్రం తెచ్చిన ఈ సవరణను అడ్డుకోవడం విచారకరమన్నారు. రాష్ట్రంలో ప్రతిపక్షంలో ఉన్నప్పటికీ, కేంద్రంలోని మోదీ ప్రభుత్వానికి జగన్ బేషరతుగా మద్దతు పలకడం వెనుక.. మోదీ చెబుతున్న దక్షిణాది ప్రయోజనాలను కాపాడటం, ఇటు కేంద్రంతో సత్సంబంధాలను కొనసాగించడమనే ద్విముఖ వ్యూహం స్పష్టంగా కనిపిస్తోంది.
తమిళనాడు గడ్డపై చంద్రబాబు విపక్షాలపై విసుర్లు
ప్రస్తుతం తమిళనాడు ఎన్నికల ప్రచారంలో బిజీగా ఉన్న ముఖ్యమంత్రి చంద్రబాబు నాయుడు, 131వ రాజ్యాంగ సవరణ బిల్లు వీగిపోవడంపై అక్కడి నుంచే కాంగ్రెస్, డీఎంకేలపై విరుచుకుపడ్డారు. ఏప్రిల్ 17ను భారత రాజకీయ చరిత్రలో ఒక నల్లని రోజుగా ఆయన అభివర్ణించారు. దేశాభివృద్ధికి, మహిళా సాధికారతకు అడ్డంకిగా మారిన విపక్షాలకు రాబోయే రోజుల్లో ప్రజలే తగిన బుద్ధి చెబుతారని హెచ్చరించారు. పొరుగు రాష్ట్రం తమిళనాడులో ఉండి కూడా, అక్కడి అధికార పార్టీ డీఎంకే వైఖరిని తప్పుపట్టడం ద్వారా చంద్రబాబు తన రాజకీయ పదునును మరోసారి ప్రదర్శించారు.
ఎన్డీఏ అగ్రనేతగా మోదీకి బాసట
కేవలం ఏపీ ముఖ్యమంత్రిగానే కాకుండా, ఎన్డీఏలో కీలక భాగస్వామిగా ఉన్న చంద్రబాబు.. ప్రధాని మోదీ అజెండాను జాతీయ స్థాయిలో బలంగా వినిపిస్తున్నారు. ఏపీలో కూటమి ధర్మాన్ని పాటిస్తూనే, కేంద్రంలో మోదీ నాయకత్వానికి ఉన్న ప్రాముఖ్యతను ఆయన పునరుద్ఘాటించారు. దేశవ్యాప్తంగా మహిళా రిజర్వేషన్లు అమల్లోకి రావాల్సిన తరుణంలో విపక్షాలు అడ్డుతగలడం దురదృష్టకరమని పేర్కొంటూ.. ప్రధాని మోదీ తీసుకునే ప్రతి విప్లవాత్మక నిర్ణయానికి తన సంపూర్ణ మద్దతు ఉంటుందని స్పష్టం చేశారు. ఈ పరిణామం ద్వారా అటు జగన్, ఇటు చంద్రబాబు ఇద్దరూ తమ రాజకీయ విభేదాలను పక్కన పెట్టి మోదీకి రెండు కళ్లుగా నిలిచినట్లయ్యింది.
విరుద్ధ రాజకీయాలు.. విలక్షణ బంధాలు
ప్రస్తుత ఆంధ్రప్రదేశ్ రాజకీయ ముఖచిత్రం ఒక విచిత్రమైన వైరుధ్యంతో కనిపిస్తోంది. రాష్ట్ర స్థాయిలో చూస్తే, వైఎస్సార్సీపీని నామరూపాలు లేకుండా చేయడమే లక్ష్యంగా చంద్రబాబు కూటమి సర్వశక్తులూ ఒడ్డుతోంది. మరోవైపు తన రాజకీయ ఉనికిని కాపాడుకోవడానికి జగన్ పోరాడుతున్నారు. ఇక్కడ ఇద్దరి మధ్య పచ్చగడ్డి వేస్తే భగ్గుమనేంతటి రాజకీయ యుద్ధం నడుస్తోంది. కానీ, సీన్ కట్ చేస్తే.. ఢిల్లీ వేదికగా మాత్రం ఈ ఇద్దరు బద్ధ శత్రువులూ ప్రధాని మోదీ పట్ల అత్యంత సానుకూలతను ప్రదర్శిస్తున్నారు. చంద్రబాబు కూటమి ధర్మంతో మోదీకి బాసటగా నిలుస్తుంటే, జగన్ ప్రతిపక్షంలో ఉండి కూడా అవే అడుగులు వేయడం రాజకీయ వర్గాలను విస్మయానికి గురిచేస్తోంది.
ఓటర్లను ఆలోచింపజేస్తున్న మోదీ ఫ్యాక్టర్
అటు చంద్రబాబు, ఇటు జగన్.. ఇద్దరూ మోదీ అజెండాకే జై కొట్టడం ఏపీ ఓటర్లను ఆశ్చర్యానికి గురిచేస్తోంది. రాష్ట్రంలో కత్తులు నూరుకుంటున్న వీరు, కేంద్రం దగ్గరకు వెళ్లేసరికి ఒకే మాట మీద ఎలా ఉంటున్నారు? అన్నది ఇప్పుడు సామాన్య జనం మెదడును తొలిచేస్తున్న ప్రశ్న. 131వ రాజ్యాంగ సవరణ బిల్లు విషయంలో వీరిద్దరి ఏకాభిప్రాయం.. రాష్ట్ర రాజకీయ ప్రయోజనాల కంటే కేంద్రంతో సత్సంబంధాలే ముఖ్యమనే సంకేతాన్ని పంపుతోంది. మొత్తానికి గోపి-రాధలను కృష్ణమ్మ కలిపినట్లుగా.. ఏపీ రాజకీయాల్లోని ఈ రెండు ధృవాలను కేంద్రం పట్ల ఉన్న సానుకూలత ఒక్కటి చేయడం, రాబోయే కాలంలో ఏపీ రాజకీయాల్లో మరిన్ని ఆసక్తికర మలుపులకు నాంది పలుకుతోంది.
ఏపీ రాజకీయాల్లో కొత్త శకం..కేంద్రం చుట్టూ తిరుగుతున్న రాష్ట్ర గమ్యం
నిజానికి, 131వ రాజ్యాంగ సవరణ బిల్లు వీగిపోవడం అనేది కేవలం ఒక పార్లమెంటరీ పరిణామం మాత్రమే కాదు.. అది ఆంధ్రప్రదేశ్ రాజకీయాల్లో ఒక అరుదైన సంధి కాలానికి నాంది పలికింది. రాష్ట్రంలో అధికారం కోసం కత్తులు నూరుకుంటున్న చంద్రబాబు, జగన్.. ఢిల్లీ వేదికగా ప్రధాని మోదీ పక్షాన నిలబడటం ఒక చారిత్రక విచిత్రం. అటు కూటమి ధర్మంతో చంద్రబాబు, ఇటు నైతిక మద్దతుతో జగన్.. ఇద్దరూ మోదీకి రక్షణ కవచంలా నిలవడంతో, ఏపీ రాజకీయ భవిష్యత్తు ఇప్పుడు అమరావతి-తాడేపల్లి మధ్య మాత్రమే కాదు, ఢిల్లీ వీధుల్లో కూడా నిర్ణయించబడుతుందని స్పష్టమవుతోంది.
రాష్ట్రంలో బద్ధ శత్రువులైన ఈ ఇద్దరు నేతలు కేంద్రం విషయంలో ప్రదర్శిస్తున్న ఈ అనూహ్య ఐక్యత.. రాబోయే రోజుల్లో ఏపీ రాజకీయ సమీకరణాలను ఊహించని మలుపులు తిప్పబోతోంది. రాష్ట్ర ప్రయోజనాల కోసం కేంద్రంతో సాగిస్తున్న ఈ ద్విముఖ వ్యూహం ఓటర్లను ఏ మేరకు మెప్పిస్తుందో చూడాలి. ఏది ఏమైనా, విభేదాలను పక్కన పెట్టి మోదీకి దన్నుగా నిలిచిన ఈ పరిణామం.. ఏపీ రాజకీయాల్లో కేంద్రం పోషిస్తున్న కింగ్ మేకర్ పాత్రను మరోసారి నొక్కి చెబుతోంది.
అన్యాయంపై మౌనం.. అధికారం కోసం రాజీ?
ప్రధాని మోదీ ప్రవేశపెట్టిన 131వ రాజ్యాంగ సవరణ బిల్లుకు జగన్, చంద్రబాబులిద్దరూ పోటీపడి మద్దతు ప్రకటించారు. అయితే, ఇదే సమయంలో రాష్ట్రానికి రావాల్సిన ప్రత్యేక హోదా, పెండింగ్ నిధులు, విభజన హామీల వంటి కీలక అంశాలపై కేంద్రాన్ని నిలదీయడంలో మాత్రం ఇద్దరు నేతలూ మౌనం వహించడం విమర్శలకు దారితీస్తోంది. రాష్ట్రంలో ఒకరు అధికారంలో ఉండి, మరొకరు ప్రతిపక్షంలో ఉండి కూడా.. నిధుల కేటాయింపుల్లో ఆంధ్రప్రదేశ్కు జరుగుతున్న అన్యాయంపై నోరు విప్పకపోవడం గమనార్హం. కేవలం మోదీ రాజకీయ అజెండాను అమలు చేయడంలో చూపుతున్న ఉత్సాహం, రాష్ట్ర హక్కులను సాధించడంలో కనిపించడం లేదన్నది సామాన్య జనం మాట.
దక్షిణాది గొంతుక ఎక్కడ?
నియోజకవర్గాల పునర్విభజన (Delimitation) జరిగితే జనాభా ప్రాతిపదికన దక్షిణాది రాష్ట్రాలు, ముఖ్యంగా ఆంధ్రప్రదేశ్ తమ రాజకీయ ప్రాధాన్యతను కోల్పోయే ప్రమాదం ఉందని గణాంకాలు చెబుతున్నాయి. జనాభా నియంత్రణ పాటించి దేశాభివృద్ధికి సహకరించిన దక్షిణాదిని శిక్షించేలా ఉన్న ఈ పరిణామాలపై పొరుగు రాష్ట్రాలైన తమిళనాడు, కేరళ గళమెత్తుతుంటే.. ఏపీ నేతలు మాత్రం మోదీకి భజన చేయడానికే ప్రాధాన్యత ఇస్తున్నారు. అటు చంద్రబాబు ఎన్డీఏ భాగస్వామిగా మౌనం పాటిస్తుంటే, ఇటు జగన్ కేంద్రం అండ కోసం ఆరాటపడుతున్నారు. ఫలితంగా రాష్ట్ర ప్రయోజనాలు, దక్షిణాది ఆత్మగౌరవం కంటే.. తమ రాజకీయ భవిష్యత్తు కోసం మోదీని ప్రసన్నం చేసుకోవడమే ఈ ఇద్దరు నేతల పరమావధిగా కనిపిస్తోందనే విమర్శలు వినిపిస్తున్నాయి.
Next Story