పుట్టపర్తికి ప్రత్యేక విమానాల్లో అవసరమా?

పుట్టపర్తిలో ప్రాజెక్టు శంకుస్థాపన కోసం ముఖ్యమంత్రి చంద్రబాబు నాయుడు, మంత్రి లోకేశ్, కేంద్ర రక్షణ మంత్రి రాజ్‌నాథ్ సింగ్ సహా పలువురు ప్రముఖులు ప్రత్యేక విమానాల్లో తరలివెళ్లారు. ఇంధన పొదుపు కోసం కాన్వాయ్‌లు తగ్గించుకోవాలని, వీలైనంత వరకు వర్చువల్ (వీడియో కాన్ఫరెన్స్) పద్ధతిలో సమావేశాలు నిర్వహించాలని పీఎం, సీఎంలు స్వయంగా సూచించిన సంగతి తెలిసిందే. మరి ఇంత మంది ప్రముఖులు విడివిడిగా లేదా ప్రత్యేక విమానాల్లో వెళ్లడం పొదుపు మంత్రం కిందకు ఎలా వస్తుందనే ప్రశ్నలు తలెత్తుతున్నాయి.

సాంకేతికత అందుబాటులో ఉన్న నేటి రోజుల్లో భారీ ప్రాజెక్టులకు శంకుస్థాపనలు లేదా ప్రారంభోత్సవాలను అమరావతి నుంచే వర్చువల్ విధానంలో నిర్వహించే అవకాశం ఉంది. దీనివల్ల విమాన ఇంధనం, భద్రత, ప్రోటోకాల్ ఖర్చులు కోట్లాది రూపాయలు ఆదా అయ్యేవి. కానీ, ప్రత్యేక విమానాల్లో వెళ్లడం వల్ల ప్రభుత్వ ఖజానాపై భారీ భారం పడిందని, ఇది కేబినెట్ తీసుకున్న పొదుపు నిర్ణయాలకు విరుద్ధంగా ఉందని విశ్లేషకులు అభిప్రాయపడుతున్నారు.

శంకుస్థాపన కార్యక్రమానికి తోడు పుట్టపర్తిలో భారీ బహిరంగ సభను నిర్వహించారు. ఈ సభకు జనాలను తరలించేందుకు వందలాది వాహనాలను వినియోగించారు. చమురు ధరలు పెరుగుతున్న తరుణంలో ఇన్ని వాహనాలను వాడటం ఇంధన పొదుపు లక్ష్యాన్ని దెబ్బతీస్తుందన్న వాదన వినిపిస్తోంది. సభకు వెచ్చించిన ఖర్చు, వాహనాల ఇంధనం, ఇతర నిర్వహణ వ్యయం కలిపితే అది ఒక చిన్నపాటి ప్రాజెక్టు బడ్జెట్‌తో సమానమవుతుందని అంచనా.

ప్రజలను బంగారం కొనుగోళ్లు తగ్గించాలని, ఏసీల వినియోగం నియంత్రించాలని కోరుతున్న ప్రభుత్వం.. తమ పర్యటనల విషయంలో అదే స్థాయి నియంత్రణ పాటించడం లేదన్న విమర్శలు వస్తున్నాయి. కేబినెట్ నిర్ణయాల ప్రకారం మంత్రులు విదేశీ పర్యటనలు, అత్యవసరం కాని ఖర్చులు తగ్గించుకోవాలి. కానీ, పుట్టపర్తి పర్యటన వంటి కార్యక్రమాలు ప్రభుత్వ ద్వంద్వ వైఖరిని ఎత్తిచూపుతున్నాయని ప్రతిపక్షాలు ఆరోపిస్తున్నాయి. సోషల్ మీడియాలో కూడా చర్చ జరుగుతోంది.

సంక్షోభ సమయంలో పొదుపు పాటించడం ప్రతి ఒక్కరి బాధ్యత. అయితే, పాలకులు స్వయంగా ఆదర్శంగా నిలిచినప్పుడే ప్రజల్లో మార్పు వస్తుంది. భవిష్యత్తులోనైనా ఇలాంటి కార్యక్రమాలను వర్చువల్ పద్ధతిలో నిర్వహించి, అనవసర ప్రయాణ ఖర్చులను తగ్గించుకున్నప్పుడే ప్రభుత్వం ప్రకటించిన పొదుపు మంత్రం సార్థకమవుతుందనే అభిప్రాయం ప్రజల్లో వ్యక్తం అవుతోంది.