కేజీ బేసిన్ సంపదపై రాష్ట్ర హక్కులు సాధించాలి: సీపీఎం

జనసేన అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ఇటీవల కమ్యూనిజంపై చేసిన వ్యాఖ్యలకు సీపీఎం రాష్ట్ర కార్యదర్శి వి. శ్రీనివాసరావు ఘాటుగా స్పందించారు. కమ్యూనిజం చరిత్రలో ఎన్నో ఒడిదుడుకులు ఎదుర్కొన్నప్పటికీ, శాపనార్థాలు లేదా విమర్శలతో అది అంతరించిపోదని స్పష్టం చేశారు.

ది ఫెడరల్ ప్రతినిధికి ఇచ్చిన ఒక ప్రత్యేక ఇంటర్వ్యూలో మాట్లాడుతూ, సోవియట్ యూనియన్ పతనం తర్వాత ప్రపంచవ్యాప్తంగా కమ్యూనిస్టు ఉద్యమాలు బలహీనపడిన మాట వాస్తవమేనని అంగీకరించిన ఆయన, అయితే సామాజిక అసమానతలు, కార్పొరేట్ ఆధిపత్యం పెరుగుతున్న నేపథ్యంలో కొత్త తరం మళ్లీ ప్రత్యామ్నాయ రాజకీయాల వైపు చూస్తోందని పేర్కొన్నారు.

పవన్ కళ్యాణ్, చంద్రబాబు నాయుడు వంటి నాయకులు కమ్యూనిజం అంతరించిపోయిందని చెబుతున్నప్పటికీ, ప్రపంచ రాజకీయాల్లో ఇప్పటికీ సామ్యవాద ఆలోచనల ప్రభావం కనిపిస్తోందన్నారు. అమెరికా-చైనా పోటీ, ప్రపంచ ఆర్థిక మార్పులు కూడా ఆ దిశగా సంకేతాలు ఇస్తున్నాయని వ్యాఖ్యానించారు.

రాష్ట్ర రాజకీయాలపై స్పందిస్తూ, ప్రస్తుత ప్రభుత్వ విధానాలు ప్రైవేటీకరణకు ప్రాధాన్యం ఇస్తున్నాయని విమర్శించారు. పెట్టుబడుల పేరుతో ప్రకటిస్తున్న భారీ సంఖ్యల వెనుక వాస్తవ ఉద్యోగాల కల్పన కనిపించడం లేదని, సాంకేతిక పరిజ్ఞానం బదిలీ లేకుండా రాష్ట్ర అభివృద్ధి సాధ్యం కాదన్నారు.

కృష్ణా-గోదావరి (కేజీ) బేసిన్ సహజ వనరుల విషయంలో ఆంధ్రప్రదేశ్‌కు రావాల్సిన వాటా, రాయల్టీలపై కేంద్రం, రాష్ట్ర ప్రభుత్వాలు మరింత దృఢంగా పోరాడాల్సిన అవసరం ఉందని సూచించారు.

Stop plunder of Gas from KG Basin

సహజ వనరులపై కార్పొరేట్ ఆధిపత్యం పెరగడం వల్ల ప్రజా ప్రయోజనాలు దెబ్బతింటున్నాయని ఆరోపించారు. రిలయన్స్ అధినేతల్ని ప్రశ్నించే దమ్మూ ధైర్యం చంద్రబాబుకు లేదన్నారు.

2029 ఎన్నికల నాటికి మూడో రాజకీయ ప్రత్యామ్నాయం ఏర్పడే అవకాశాలపై స్పందిస్తూ, ప్రస్తుతం దానికి అనుకూల పరిస్థితులు పూర్తిగా లేవని, ముందుగా ప్రజా ఉద్యమాల ద్వారా సామాజిక-రాజకీయ వేదికను బలోపేతం చేయాల్సిన అవసరం ఉందన్నారు.