అజ్ఞాత పర్యటనలు..అంతుచిక్కని వివరాలు
కూటమిలో మొదలైన గుసగుసలు
ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్ గత వారం రోజులుగా ఎక్కడికి వెళ్లారు? ఆయన పర్యటన అంత రహస్యంగా ఎందుకు సాగుతోంది? నారా లోకేష్ పర్యటనలపై గోప్యతను ఎందుకు పాటిస్తున్నారు? ఇప్పుడు ఇవే ప్రశ్నలు అటు తెలుగుదేశం పార్టీలోనూ, ఇటు కూటమి భాగస్వామ్య పక్షాలైన జనసేన, బీజేపీ వర్గాల్లోనూ తీవ్ర చర్చకు దారితీస్తున్నాయి. ఈ నెల 19వ తేదీ నుంచి లోకేష్ రాష్ట్రంలో ఎక్కడా కనిపించకపోవడంతో, ఆయన విదేశీ పర్యటనకు వెళ్లారనే ప్రచారం జోరుగా సాగుతోంది. సాధారణంగా మంత్రుల పర్యటనలకు సంబంధించి అధికారిక ఉత్తర్వులు (GOలు) వెలువడటం ఆనవాయితీ. కాగా, లోకేశ్ పర్యటన విషయంలో అటు ప్రభుత్వం గానీ, ఇటు పార్టీ గానీ ఎటువంటి సమాచారం వెల్లడించకపోవడం ఇప్పుడు రాజకీయ వర్గాల్లో అనేక సందేహాలకు తావిస్తోంది.
మంత్రిగా ఉండి కీలక బాధ్యతలు నిర్వహిస్తున్న సమయంలో, ఎవరికీ అందుబాటులో లేకుండా ఇలాంటి రహస్య టూర్లు ఏమిటని సొంత పార్టీలోని కొందరు నేతలే అసహనం వ్యక్తం చేస్తున్నట్లు తెలుస్తోంది. గతంలోనూ తండ్రీకొడుకులు ఇలాగే ఎవరికీ తెలియకుండా విదేశీ పర్యటనలు చేసిన ఉదంతాలను గుర్తు చేసుకుంటున్న నేతలు, అసలు ఈ గోప్యత వెనుక ఉన్న మర్మమేంటని ఆరా తీస్తున్నారు.
నిబంధనల ఉల్లంఘనేనా?
సాధారణంగా ముఖ్యమంత్రి, మంత్రులు లేదా ఉన్నతాధికారులు అధికారిక పని మీద వెళ్లినా, లేదా వ్యక్తిగత పర్యటనలకు వెళ్లినా దానికి సంబంధించిన జీఓ (Government Order) విడుదల చేయడం ప్రభుత్వ ఆనవాయితీ. ఒక్కరోజు ఢిల్లీ పర్యటనకు వెళ్లినా ఐఏఎస్, ఐపీఎస్ అధికారుల వివరాలతో ఉత్తర్వులు వెలువడతాయి. కనీసం భద్రతా కారణాల దృష్ట్యా అయినా పర్యటన వివరాలు వెల్లడించాల్సి ఉంటుంది. అయితే, లోకేశ్ తాజా పర్యటనకు సంబంధించి ఇప్పటివరకు ఎలాంటి అధికారిక ఉత్తర్వులు వెలువడకపోవడం విమర్శలకు తావిస్తోంది. బాధ్యతాయుతమైన మంత్రి పదవిలో ఉండి, ఇలా ఏ సమాచారం లేకుండా విదేశాలకు వెళ్లడం ఏమిటని సొంత పార్టీ నేతలే అసహనం వ్యక్తం చేస్తున్నారు.
పునరావృతమవుతున్న మిస్టరీ టూర్లు
కూటమి ప్రభుత్వం అధికారంలోకి వచ్చిన నాటి నుండి ముఖ్యమంత్రి చంద్రబాబు నాయుడు, మంత్రి లోకేశ్ల పర్యటనలు తరచూ వివాదాస్పదమవుతున్నాయి. సాధారణంగా ప్రజా ప్రతినిధుల పర్యటనలు పారదర్శకతతో కూడి ఉండాలి, కానీ వీరి విషయంలో మాత్రం భిన్నమైన పరిస్థితులు కనిపిస్తున్నాయి. ఎక్కడికి వెళ్తున్నారు, ఎవరిని కలుస్తున్నారు అనే ప్రాథమిక సమాచారం కూడా ప్రభుత్వం వెల్లడించకపోవడం అనేక రాజకీయ విమర్శలకు తావిస్తోంది.
ఇద్దరూ ఒకేసారి
గతంలో 2025 డిసెంబర్ చివరి వారం నుండి 2026 జనవరి మొదటి వారం వరకు ముఖ్యమంత్రిగా ఉన్న నారా చంద్రబాబు నాయుడు, మంత్రిగా ఉన్న లోకేశ్ ఇద్దరూ ఒకేసారి రాష్ట్రంలో లేకుండా పోవడం తీవ్ర చర్చకు దారితీసింది. సుమారు పది రోజులకు పైగా సాగిన ఈ అజ్ఞాత పర్యటనపై అప్పట్లో ప్రతిపక్షాలతో పాటు సామాన్య ప్రజల్లోనూ ఎన్నో ప్రశ్నలు తలెత్తాయి. ప్రభుత్వం తరఫున ఎటువంటి అధికారిక ప్రకటన రాకపోవడం, అసలు వారు ఏ దేశానికి వెళ్లారు, ఆ పర్యటన ఉద్దేశ్యం ఏమిటి అనే వివరాలను ఇప్పటికీ ప్రభుత్వం బహిర్గతం చేయకపోవడం గమనార్హం.
ప్రత్యేక విమానం.. గమ్యం ఎటో?
తాజా పరిణామాల్లో మంత్రి లోకేశ్ ఒక్కరే ఎవరికీ ముందస్తు సమాచారం లేకుండా, ప్రత్యేక విమానంలో విదేశాలకు వెళ్లడం పలు సందేహాలకు ఆస్కారం ఇస్తోంది. వారం రోజులుగా రాష్ట్రంలో లేకపోయినా, కీలకమైన ఐటీ, విద్యాశాఖల సమీక్షలు నిలిచిపోయినా ప్రభుత్వం మౌనంగా ఉండటం వెనుక మర్మమేంటని రాజకీయ వర్గాలు ఆరా తీస్తున్నాయి. ఒక మంత్రి హోదాలో ఉండి కనీసం తన ప్రయాణ వివరాలను జీఓ (GO) ద్వారా గానీ, అధికారిక ప్రకటన ద్వారా గానీ వెల్లడించకపోవడం నిబంధనల ఉల్లంఘనేనని విమర్శలు వినిపిస్తున్నాయి.
సొంత పార్టీలోనే సెగ.. పాలనపై ప్రభావం
ఐటీ, విద్యాశాఖ వంటి కీలక బాధ్యతలు నిర్వహిస్తున్న మంత్రి, రాష్ట్రానికి దిశానిర్దేశం చేయాల్సిన సమయంలో ఇలా అకస్మాత్తుగా అందుబాటులో లేకుండా పోవడం ఇప్పుడు టీడీపీ లోపల ప్రకంపనలు సృష్టిస్తోంది. కీలక నిర్ణయాలు తీసుకోవాల్సిన ఫైళ్లు పెండింగ్లో పడటం, సమీక్షలు నిలిచిపోవడంతో సీనియర్ నేతల్లోనే చర్చోపచర్చలు జరుగుతున్నాయి. ప్రజలు ఎన్నో ఆశలతో అధికారాన్ని కట్టబెడితే.. ఇలా బాధ్యతలను గాలికొదిలేసి రహస్య పర్యటనలు చేయడం ఏంటి? అని కొందరు నాయకులు తమ సన్నిహితుల వద్ద గుసగుసలాడుకుంటున్నారు. ఈ పరిణామం అటు అధికారుల్లోనూ, ఇటు పార్టీ శ్రేణుల్లోనూ అయోమయానికి దారితీస్తోంది.
పాలనను గాలికొదిలేసి రహస్య ప్రయాణాలా?
రాష్ట్రంలో విద్యాసంవత్సరం ప్రారంభానికి ముందు తీసుకోవాల్సిన నిర్ణయాలు, ఐటీ రంగంలో వస్తున్న మార్పులపై మంత్రి స్థాయిలో జరగాల్సిన కసరత్తులు ఆగిపోవడం పాలనపై స్పష్టమైన ప్రభావాన్ని చూపుతోంది. కీలకమైన శాఖలకు మంత్రిగా ఉండి, కనీసం ఎక్కడికి వెళ్తున్నారో కూడా చెప్పకుండా మాయం కావడం ఒక రకమైన అనిశ్చితిని సృష్టిస్తోందని రాజకీయ విశ్లేషకులు అభిప్రాయపడుతున్నారు. ప్రజాస్వామ్యంలో ప్రజలకు జవాబుదారీగా ఉండాల్సిన ప్రజా ప్రతినిధులు ఇలా గోప్యంగా వ్యవహరించడం సంప్రదాయం కాదని సొంత కూటమి నేతలే అభిప్రాయపడుతున్నారు.
ముసురుకున్న వివాదం.. ముగింపు ఎప్పుడు?
మంత్రి లోకేశ్ పర్యటన చుట్టూ అలుముకున్న ఈ వివాదం కేవలం విదేశీ ప్రయాణం గురించి మాత్రమే కాదు, ప్రభుత్వం పారదర్శకతను కూడా ప్రశ్నిస్తోంది. ముఖ్యమంత్రి కార్యాలయం (CMO) కానీ, పార్టీ అధికారిక యంత్రాంగం కానీ దీనిపై మౌనం వహించడం మంటను మరింత పెంచుతోంది. ప్రభుత్వం నుంచి అధికారికంగా స్పష్టమైన వివరణ వచ్చే వరకు ఈ రహస్య విదేశీ పర్యటన వివాదం చల్లారేలా కనిపించడం లేదు. ఈ క్రమంలో ప్రతిపక్షాలకు కూడా ఇది ఒక ఆయుధంగా మారుతోంది. పర్యనటల వివరాలను ప్రజలకు వెల్లడించి, పారదర్శకతను పాటిస్తే ఇలాంటి విమర్శలకు తావు ఉండే అవకాశం లేదనే చర్చ కూడా బలంగా వినిపిస్తోంది.
Next Story