అమరావతి పొలిటికల్ వార్

ఈ సుదీర్ఘ సందిగ్ధతకు ప్రధాన కారణం.. అమరావతిని రెండు ప్రధాన పార్టీలు ఒక ఎలక్షన్ టూల్ గా మార్చుకోవడమే. ఒకవైపు అధికార కూటమి అమరావతిని తమ ఏకైక ప్రతిష్టాత్మక అజెండాగా చూపిస్తూ రాజకీయ పట్టు సాధించాలని చూస్తుంటే, మరోవైపు ప్రతిపక్ష వైసీపీ వికేంద్రీకరణ పేరుతో ప్రాంతీయ సెంటిమెంట్లు రేకెత్తిస్తూ తన ఓటు బ్యాంక్‌ను కాపాడుకునే ప్రయత్నం చేస్తోంది. ఈ రెండు పార్టీల వ్యూహాత్మక దాడులు, ప్రతిదాడుల మధ్య రైతుల నిజమైన భావోద్వేగాలు, వారి ఆర్థిక సమస్యలు కొట్టుకుపోతున్నాయి. ఫలితంగా అమరావతి కేవలం ఒక భూభాగంగా కాకుండా, ఓటర్లను చీల్చే ఒక రాజకీయ ఆయుధంగా మిగిలిపోతోంది.

అయితే, తరచూ జరుగుతున్న ఈ కొట్లాటలు, లా అండ్ ఆర్డర్ సమస్యలు భవిష్యత్తులో రాష్ట్రానికి జరిగే కోలుకోలేని ఆర్థిక నష్టాన్ని సూచిస్తున్నాయి. ప్రస్తుతం ప్రపంచ బ్యాంకు, ఏడీబీ వంటి అంతర్జాతీయ సంస్థల నుండి వేల కోట్ల నిధులు వస్తున్న తరుణంలో .. ఇలాంటి అశాంతి వాతావరణం ఉంటే ఏ పెద్ద ఇన్వెస్టర్ కూడా పెట్టుబడులు పెట్టడానికి ముందుకు రాడు. పెట్టుబడిదారులు ఎప్పుడూ రాజకీయ స్థిరత్వం, ప్రశాంత వాతావరణాన్ని కోరుకుంటారు. ఇప్పటికైనా ఇరు పార్టీలు స్వార్థ రాజకీయాలు పక్కనపెట్టి, భూములివ్వని రైతులతో బలవంతపు సేకరణ కాకుండా స్నేహపూర్వక చర్చలు జరపాలి. రాజకీయ కక్షల కంటే రాష్ట్ర అభివృద్ధి, యువత ఉపాధి ముఖ్యం అని భావించినప్పుడే అమరావతికి, ఆంధ్రప్రదేశ్‌కు శాశ్వత ప్రశాంతత లభిస్తుంది.