మూడో బిడ్డకు 30 వేలు.. నాలుగో బిడ్డకు 40 వేలు

ఒకప్పుడు దేశంలో జనాభాను అదుపు చేయడానికి కుటుంబ నియంత్రణ పాటించాలని గట్టిగా చెప్పాం. కానీ ఇవాళ పరిస్థితులు మారాయి.. మన పిల్లలే మన అసలైన సంపద అని సీఎం చంద్రబాబు స్పష్టం చేశారు. ఈ క్రమంలోనే కుటుంబాల్లో పిల్లల సంఖ్యను ప్రోత్సహించేందుకు ఆయన పెద్ద పీట వేశారు. ఇకపై ఎవరికైనా మూడో బిడ్డ పుడితే తక్షణమే రూ. 30 వేలు, ఒకవేళ నాలుగో బిడ్డ పుడితే రూ. 40 వేలు అందిస్తామని సంచలన ప్రకటన చేశారు. ఇప్పటికే అమలవుతున్న తల్లికి వందనం కింద రూ. 15 వేలు ఇస్తున్నామని, రాష్ట్ర ఆర్థిక పరిస్థితి మెరుగైతే ఈ మొత్తాన్ని భవిష్యత్తులో మరింత పెంచుతామని భరోసా ఇచ్చారు. సంపదను సృష్టించి పేదలకు పంచడం, ఆర్థిక అసమానతలు తగ్గించడమే తన ప్రధాన లక్ష్యమని ఆయన పేర్కొన్నారు.

గత వైఎస్సార్సీపీ ఐదేళ్ల పాలనను గొడ్డలి పార్టీ అరాచకంగా అభివర్ణిస్తూ చంద్రబాబు తీవ్ర విమర్శలు చేశారు. గత ప్రభుత్వ హయాంలో ప్రజల భూములు, ఆస్తులను మార్చేసి తీవ్ర గందరగోళం సృష్టించారని మండిపడ్డారు. కూటమి ప్రభుత్వం అధికారంలోకి వచ్చిన వెంటనే ప్రజల ఆస్తుల జోలికి ఎవరూ రాకుండా కఠిన చర్యలు చేపట్టామని, రాష్ట్రంలో ఎక్కడా భూ తగాదాలు లేకుండా చేసే పూర్తి బాధ్యత తమ ప్రభుత్వానిదేనని ఆయన శ్రీకాకుళం ప్రజల సాక్షిగా హామీ ఇచ్చారు.

సమాజం మారితేనే స్వర్ణాంధ్ర సాకారమవుతుందని నమ్మిన చంద్రబాబు, నరసన్నపేట వేదికగా ఆపరేషన్‌ క్లీన్‌ స్వీప్‌ కు శ్రీకారం చుట్టారు. నాలుగు రోజుల పాటు సాగే ఈ ప్రత్యేక పారిశుధ్య కార్యక్రమంలో కలెక్టర్ల పర్యవేక్షణలో ప్రతిరోజూ క్లీన్‌డ్రైవ్‌లు నిర్వహించాలని ఆదేశించారు. సింగిల్‌ యూజ్‌ ప్లాస్టిక్‌ను పూర్తిగా నిషేధించాలని, వ్యర్థాల నుంచి కరెంట్‌, సంపదను సృష్టించేలా పార్కులను ఏర్పాటు చేస్తున్నామని వివరించారు. ప్రజల అలవాట్లు మారినప్పుడే స్వచ్ఛత సాధ్యమని పిలుపునిచ్చారు.

ఉత్తరాంధ్ర వలసల కష్టాలపై స్పందిస్తూ సీఎం చంద్రబాబు యువతకు భారీ భరోసా ఇచ్చారు. గత 23 నెలల్లో రాష్ట్రానికి ఏకంగా రూ. 23 లక్షల కోట్ల పెట్టుబడులు వచ్చాయని, ప్రభుత్వం కుదుర్చుకున్న ఒప్పందాల ద్వారా మన పిల్లలకు 24 లక్షల ఉద్యోగాలు లభిస్తాయని వెల్లడించారు. ఇప్పటికే విశాఖపట్నానికి ప్రతిష్టాత్మక గూగుల్ సంస్థను తీసుకువచ్చామని గుర్తుచేశారు. ఇకపై ఉత్తరాంధ్ర యువత ఉపాధి కోసం ఇతర ప్రాంతాలకు వలస వెళ్లాల్సిన అవసరం లేదని, ఇక్కడ రాబోయే భారీ పరిశ్రమల కారణంగా బయటి ప్రాంతాల వారే ఉత్తరాంధ్రకు వలస వచ్చేలా ఈ ప్రాంత రూపురేఖలు మారుస్తామని ముఖ్యమంత్రి ధీమా వ్యక్తం చేశారు.