యువత ఆందోళనను భారత్ లో అణిచివేస్తున్నారు: ఐరాస

అక్టోబర్ 20న ఐక్యరాజ్యసమితి జనరల్ అసెంబ్లీలోని మూడో కమిటీలో భారత విదేశాంగ మంత్రిత్వ శాఖ డిప్యూటీ సెక్రటరీ బర్ఖా తమ్రాకర్ ఈ అంశంపై మాట్లాడారు. అంతర్జాతీయ మానవ హక్కుల వ్యవస్థలు నిష్పక్షపాతంగా వ్యవహరించాలని, సంభాషణ, సహకారం, పారదర్శకతకు ప్రాధాన్యం ఇవ్వాలని భారత్ కోరింది. నివేదికల్లోని ఆందోళనలను నిర్ధారిత వాస్తవాలుగా పరిగణించకూడదని పేర్కొంది.

అంతకుముందు, భారత్‌లో యువత చేపట్టిన నిరసనలపై 20 మందికి పైగా ఐక్యరాజ్యసమితి మానవ హక్కుల నిపుణులు ఆందోళన వ్యక్తం చేశారు. గత మూడు నెలలుగా ఢిల్లీ సహా పలు ప్రాంతాల్లో శాంతియుతంగా నిరసనలు తెలిపిన యువతపై పోలీసులు పదేపదే కఠిన చర్యలు తీసుకుంటున్నారని ఆరోపించారు.

ప్రభుత్వ విద్యా విధానాలకు వ్యతిరేకంగా, ఓటర్ల జాబితాల నుంచి పేర్ల తొలగింపును నిరసిస్తూ విద్యార్థులు, వారి మద్దతుదారులు ఆందోళనలు చేపట్టినట్లు నిపుణులు తెలిపారు. ఓటర్ల జాబితాల్లో మార్పులు సుమారు 13 కోట్ల మందిపై ప్రభావం చూపుతున్నాయని పేర్కొన్నారు.

ఢిల్లీలో 7,000 మందికి పైగా యువకులు, జర్నలిస్టులు, న్యాయవాదులు, మానవ హక్కుల కార్యకర్తలు, రాజకీయ పార్టీల సభ్యులను పోలీసులు నిర్బంధించినట్లు వచ్చిన నివేదికలపైనా వారు ఆందోళన వ్యక్తం చేశారు. వీరిలో చాలామందిని 24 గంటల్లోనే విడుదల చేసినట్లు తెలిపారు. నిర్బంధాల సమయంలో గాయాలు, దుర్వ్యవహారం, లింగ ఆధారిత వేధింపులు జరిగినట్లు వచ్చిన ఆరోపణలను కూడా ప్రస్తావించారు.

అలాగే, భారతీయ నాగరిక్ సురక్షా సంహితలోని సెక్షన్ 163 కింద బహిరంగ సమావేశాలపై ఆంక్షలు విధించడం, రవాణా, ఇంటర్నెట్ సేవలను నిలిపివేయడంపై ప్రశ్నలు లేవనెత్తారు. శాంతియుతంగా నిరసన తెలిపే హక్కును పరిరక్షించాలని, ఉల్లంఘనలకు సంబంధించిన ఆరోపణలపై విచారణ జరిపించాలని భారత అధికారులను కోరారు.

మరోవైపు, అంతర్జాతీయ మానవ హక్కుల వ్యవస్థలు అన్ని దేశాల విషయంలోనూ ఒకే విధమైన ప్రమాణాలను పాటించాలని భారత్ స్పష్టం చేసింది. ఈ పరిణామాలతో దేశంలో నిరసనలపై పోలీసుల చర్యలు, పౌర హక్కుల పరిరక్షణ, అంతర్జాతీయ సంస్థల విమర్శలకు భారత్ ఇచ్చిన సమాధానం చర్చనీయాంశంగా మారాయి.