ఇరాన్ నగరాలపై అమెరికా నిప్పుల వాన

ఇరాన్ సైనిక మౌలిక సదుపాయాలను లక్ష్యంగా చేసుకుని అమెరికా దళాలు వరుసగా రెండో రోజు కూడా దాడులు కొనసాగించాయి. తమ తాజా దాడులలో వాయు రక్షణ వ్యవస్థలు, క్షిపణి, డ్రోన్ నిల్వ కేంద్రాలు, ఇతర ఆస్తులను లక్ష్యంగా చేసుకుని సుమారు 90 ఇరాన్ సైనిక లక్ష్యాలను ఛేదించినట్లు అమెరికా సైనిక అధికారులు తెలిపారు.

"హార్ముజ్ జలసంధిలో వాణిజ్య నౌకలు, అమాయక పౌర నావికులపై దాడి చేసే ఇరాన్ సామర్థ్యాన్ని మరింత బలహీనపరిచేందుకు, జూలై 8న ఇరాన్‌పై అమెరికా అదనపు విడత దాడులను పూర్తి చేసింది" అని యూఎస్ సెంట్రల్ కమాండ్ (సెంట్‌కామ్) Xలో పోస్ట్ చేసిన ఒక ప్రకటనలో పేర్కొంది.

ఇదిలా ఉండగా, ట్రంప్ తన బెదిరింపులను మరింత తీవ్రతరం చేస్తూ, హార్ముజ్ జలసంధిలో టెహ్రాన్ నౌకలను లక్ష్యంగా చేసుకునే దానికంటే 20 రెట్లు ఎక్కువగా అమెరికా సైన్యం ఇరాన్ లక్ష్యాలపై దాడి చేస్తుందని విలేకరులతో అన్నారు.

వాషింగ్టన్‌తో కాల్పుల విరమణ ఒప్పందం కోసం టెహ్రాన్ 'తీవ్రంగా' కోరుకుంటోందని ఆయన పేర్కొన్నారు. అతను ఎయిర్ ఫోర్స్ వన్ విమానంలో విలేకరులతో మాట్లాడుతూ, “కొద్దిసేపటి క్రితం ఇరాన్ ఫోన్ చేసింది. వారు ఒక ఒప్పందం చేసుకోవాలని తీవ్రంగా కోరుకుంటున్నారు. కానీ వారు దానికి అర్హులో కాదో నాకు తెలియదు. వారు ఆ ఒప్పందాన్ని గౌరవిస్తారో లేదో నాకు తెలియదు. అదే సమస్య.” అని అన్నారు.

ఇరాన్ అణు విద్యుత్ కేంద్రం ఉన్న బుషెహర్‌తో పాటు, దక్షిణ ఓడరేవు నగరాలైన చబహార్, కొనార్క్, బందర్ అబ్బాస్, సిరిక్‌లతో సహా దక్షిణ ఇరాన్ తీరం వెంబడి పలుచోట్ల పేలుళ్లు సంభవించినట్లు ఇరాన్ ప్రభుత్వ మీడియా నివేదించింది. ఇరాన్‌షహర్‌లోని ఒక వైమానిక స్థావరం కూడా అమెరికా దాడులు చేసింది. అల్ జజీరా ప్రకారం, అమెరికా దళాలు ఇరాన్ దక్షిణ తీరప్రాంతాలపై "పవిత్ర నగరమైన మషద్ వైపు తూర్పు ప్రావిన్సులలోని రెండు వంతెనలపై" కూడా దాడి చేశాయని ఇస్లామిక్ రివల్యూషనరీ గార్డ్ కార్ప్స్ (IRGC) తెలిపింది.

హతమైన సుప్రీం లీడర్ అయతోల్లా అలీ ఖమేనీని గురువారం తరువాత మషద్ నగరంలోనే ఖననం చేయనున్నారు. తాము "చారిత్రాత్మక" అంత్యక్రియల వేడుకగా అభివర్ణించిన దానిపై దాడులు చేయాలనే లక్ష్యంతోనే అమెరికా ఈ దాడులు చేసిందని ఐఆర్జీసీ ఆరోపించింది.

ఒకవేళ అమెరికా మరిన్ని దాడులు చేస్తే, ఈ ప్రాంతంలోని ఇతర అమెరికన్ స్థావరాలను కూడా లక్ష్యంగా చేసుకుని ఇరాన్ తీవ్రంగా దాడులు చేస్తుందని హెచ్చరించింది.

రెండు పక్షాలు దాడులు చేయడంతో వీటి మధ్య కుదిరిన మధ్యంతర కాల్పుల విరమణ ఒప్పందం ముందుకు సాగడం కష్టంగా మారింది. ఇంకో వైపు ఇరాన్ కూడా గల్ఫ్ దేశాలపై దాడులకు దిగింది. అక్కడ ఉన్న అమెరికా సైనిక స్థావరాలే లక్ష్యంగా క్షిపణులు, డ్రోన్లు ప్రయోగించింది. అయితే, మూడు గల్ఫ్ అరబ్ దేశాలలో నష్టం జరిగినట్లు తక్షణ సమాచారం ఏదీ లేదు. వస్తున్న డ్రోన్‌లు, క్షిపణులను అడ్డుకుంటున్నట్లు కువైట్ సైన్యం తెలిపింది.

ఇరాన్‌పై అమెరికా వరుసగా రెండో రోజు దాడులు జరపడంతో, గురువారం హార్ముజ్ జలసంధి గుండా నౌకా రవాణా కార్యకలాపాలు దాదాపుగా నిలిచిపోయాయి. ఇది ఇరు దేశాల మధ్య ఉన్న పెళుసైన కాల్పుల విరమణ స్థిరత్వంపై కొత్త సందేహాలను రేకెత్తించింది.

కీలకమైన ఈ ప్రపంచ ఇంధన మార్గంలో చాలా నౌకల కదలికలు, జలసంధికి ఉత్తర వైపున ఇరాన్ ఆమోదించిన మార్గంలోనే జరుగుతున్నాయని షిప్-ట్రాకింగ్ డేటా చూపించిందని, అయితే అమెరికా మద్దతు ఉన్న ఒమన్ కారిడార్‌లో కార్యకలాపాలు చాలా తక్కువగా ఉన్నాయని బ్లూమ్‌బెర్గ్ నివేదించింది.

పెద్ద నౌకలలో, పర్షియన్ గల్ఫ్ నుంచి బయలుదేరుతున్న అమెరికా ఆంక్షలు విధించిన ఒక సూపర్‌ట్యాంకర్, ఇరాన్ జెండా ఉన్న ఒక కంటైనర్ షిప్ మాత్రమే జలసంధి గుండా వెళుతున్నట్లు తెలిసింది. అయితే, కొన్ని నౌకలు తమ ట్రాన్స్‌పాండర్‌లను స్విచ్ ఆఫ్ చేసి ఈ జలమార్గాన్ని దాటి ఉండవచ్చనే తెలుస్తోంది.