త్వరలోనే భారత్ తో వాణిజ్య ఒప్పందం: ట్రంప్

మంగళవారం ఓవల్ ఆఫీస్‌లో విలేకరులతో మాట్లాడిన ట్రంప్.. భారత్‌తో వాణిజ్య ఒప్పందం దాదాపు ఖరారైనట్టేనని తెలిపారు. ఇరు దేశాలు ఒప్పందం కుదుర్చుకోవడానికి ఆసక్తిగా ఉన్నాయని పేర్కొన్నారు.

మరోవైపు, అమెరికా విదేశాంగ కార్యదర్శి మార్కో రూబియో భారత్ పర్యటనలో ఉన్నారు. ఈ సందర్భంగా ఇరు దేశాల మధ్య సంబంధాలను మరింత బలోపేతం చేసే అంశాలపై చర్చలు జరిగాయి. ముఖ్యంగా వాణిజ్యం, ఇంధనం, సాంకేతికత, రక్షణ, ప్రజల మధ్య సంబంధాలపై ఇరు దేశాలు దృష్టి సారించాయి.

ఇదిలా ఉంటే, ఈ నెల ప్రారంభంలో భారత వాణిజ్య మంత్రి పీయూష్ గోయల్.. అమెరికా వాణిజ్య ప్రతినిధి జేమీసన్ గ్రీర్‌తో మిల్వాకీ, వాషింగ్టన్‌లలో సమావేశమయ్యారు. ద్వైపాక్షిక వాణిజ్య ఒప్పందానికి సంబంధించిన కీలక అంశాలపై ఈ సందర్భంగా చర్చించారు.

భారత్, అమెరికా మధ్య వాణిజ్య ఒప్పందం మొదటి దశ ముసాయిదాను ఖరారు చేసినట్లు ఇరు దేశాలు ఈ ఏడాది ఫిబ్రవరిలో ప్రకటించాయి. అయితే, అమెరికా సుంకాల విధానంలో మార్పులు రావడంతో ఒప్పందంపై మరిన్ని చర్చలు అవసరమయ్యాయి. ఈ నేపథ్యంలో ట్రంప్ తాజా వ్యాఖ్యలు ప్రాధాన్యం సంతరించుకున్నాయి. ఒప్పందం ఎప్పుడు ఖరారవుతుంది, దాని నిబంధనలు ఎలా ఉంటాయన్నది ఇప్పుడు ఆసక్తికరంగా మారింది.