ఇరాన్‌తో యుద్ధం ముగింపునకు సంకేతాలు..

ఫిబ్రవరి 28న ప్రారంభమైన యుద్ధం అనంతరం ప్రపంచ చమురు రవాణాకు అత్యంత కీలకమైన హార్ముజ్ జలసంధిని వెంటనే, పూర్తిగా తిరిగి తెరవడం ప్రతిపాదిత ఒప్పందంలో ప్రధాన అంశంగా ఉంటుందని ట్రంప్ తెలిపారు. అలాగే ఇరాన్ అణు ముప్పుకు ముగింపు పలకడం కూడా ఈ ఒప్పందంలో భాగమని చెప్పారు.

అమెరికా గతంలో ఎన్నడూ లేని స్థాయిలో సైనిక చర్యలకు సిద్ధంగా ఉన్నప్పటికీ, ఇరాన్‌తో పాటు పలు గల్ఫ్ దేశాలు దాడులు నిలిపివేసి చర్చలకు అవకాశం ఇవ్వాలని కోరినట్లు ట్రంప్ వెల్లడించారు. ప్రపంచ శాంతి, ప్రాంతీయ స్థిరత్వం, అలాగే అభివృద్ధి చెందిన ఇరాన్ కోసం వేగంగా ఒప్పందం కుదిరితే సైనిక చర్యలను విరమించేందుకు తాను అంగీకరించినట్లు తెలిపారు.

ఇరాన్‌తో శాంతి ఒప్పందాన్ని పూర్తి చేసే ప్రక్రియలో అమెరికాతో కలిసి పనిచేయడానికి ఇజ్రాయెల్ కూడా అంగీకరించిందని ట్రంప్ పేర్కొన్నారు. దీంతో యుద్ధానికి ముగింపు పలికే ప్రయత్నాలు వేగం పుంజుకునే అవకాశం కనిపిస్తోంది.

ఉద్రిక్తతలు పెంచవద్దని సౌదీ సూచన

ఇదిలా ఉండగా, సౌదీ యువరాజు మహమ్మద్ బిన్ సల్మాన్ ట్రంప్‌తో జరిపిన ఫోన్ సంభాషణలో ఇరాన్‌పై కొత్త దాడులు ప్రాంతీయ ఉద్రిక్తతలను మరింత పెంచే ప్రమాదం ఉందని ఆందోళన వ్యక్తం చేసినట్లు సమాచారం.

ఇరాన్ ఇంధన మౌలిక సదుపాయాలపై అమెరికా దాడులు జరిగితే, ప్రతీకారంగా టెహ్రాన్ సౌదీ అరేబియా సహా ఇతర గల్ఫ్ దేశాల చమురు, ఇంధన కేంద్రాలను లక్ష్యంగా చేసుకునే అవకాశం ఉందని సౌదీ వర్గాలు భావిస్తున్నట్లు తెలుస్తోంది.

ఈ విషయాన్ని మొదట ఆక్సియోస్ వార్తా సంస్థ వెల్లడించింది. ట్రంప్‌తో జరిగిన తాజా చర్చలో అమెరికా తదుపరి చర్యలపై స్పష్టత ఇవ్వాలని సౌదీ యువరాజు కోరినట్లు సమాచారం. కాగా, ట్రంప్ మరియు సౌదీ యువరాజు మధ్య ఫోన్ సంభాషణ జరిగిన విషయాన్ని వైట్ హౌస్ ధృవీకరించినప్పటికీ, ఆ చర్చ వివరాలను మాత్రం వెల్లడించలేదు.