భారత్ లా మా వద్ద అవి లేవన్న పాకిస్తాన్

ప్రపంచ సరఫరాలో ఏర్పడే ఆకస్మిక ఒడిదుడుకులను తట్టుకోవడానికి భారతదేశంలా కాకుండా తమ వద్ద ఎలాంటి "వ్యూహాత్మక చమురు నిల్వలు" లేవని పాకిస్తాన్ పేర్కొంది. ఈ విషయాన్ని ఇటీవల పాకిస్తాన్ పెట్రోలియం మంత్రి అలీ పర్వేజ్ మాలిక్ అంగీకరించారు.

చమురు నిల్వల కొరతపై సమా టీవీతో మాట్లాడారు. పాకిస్తాన్ వద్ద కేవలం కొన్ని నిల్వలు మాత్రమే ఉన్నాయని మాలిక్ అన్నారు. "మా వద్ద ఎలాంటి వ్యూహాత్మక చమురు నిల్వలు లేవు. మా వద్ద కేవలం వాణిజ్య నిల్వలు మాత్రమే ఉన్నాయి" అని హిందుస్థాన్ టైమ్స్ పేర్కొంది.

పాకిస్తాన్ లోని ముడిచమురు కేవలం "ఐదు నుంచి ఏడు రోజులు" మాత్రమే సరిపోతుందని, మరోవైపు భారత్ "కేవలం ఒక్క సంతకంతోనే" చాలా పెద్ద చమురు నిల్వలను ఉపయోగించుకోగలదని మంత్రి అన్నారు. భారత్ తో పోలికపై ఆయన మాట్లాడుతూ.. రెండు దేశాల మధ్య ఉన్న ఆర్థిక వ్యత్యాసాలను ఎత్తి చూపారు.

భారత్ సుమారు 60-70 రోజులకు సరిపడా వ్యూహాత్మక, వాణిజ్య నిల్వలను నిర్వహిస్తోందని కూడా చెప్పారు. ఇలాంటి పరిస్థితికి స్పందించడానికి భారతదేశానికి "ఆర్థిక వెసులుబాటు" ఉందని, ఇందులో భాగంగా చమురు ధరలు పెరిగిన సందర్భంలో పన్నులు తగ్గించడం కూడా ఉంటుందని ఆయన అన్నారు.

పాకిస్తాన్‌లో ఇంధన ధరలు 42.7 శాతం మేర పెరిగాయి. ఈ తరుణంలో మంత్రి ఈ వ్యాఖ్యలు చేశారు. దీంతో ధరలు 321.17 నుంచి 458.41కి చేరాయని ఏఎన్ఐ నివేదించింది.

పాకిస్తాన్ ప్రధాన మంత్రి షెహబాజ్ షరీఫ్ పెట్రోల్ ధరలను లీటరుకు పీకేఆర్ 80 తగ్గించి పీకేఆర్ 378కి చేర్చినప్పటికీ, ప్రజల సమస్యలను పరిష్కరించడంలో ఇది పెద్దగా ప్రభావం చూపలేదని నివేదికలు చెబుతున్నాయి.

అంతర్జాతీయ ద్రవ్య నిధి (ఐఎంఎఫ్)కి ఇస్లామాబాద్ ఇచ్చిన హామీల వల్ల ఆ దేశ స్పందన ప్రభావితమైందని, ఇది ప్రభుత్వ సౌలభ్యాన్ని తగ్గించిందని మాలిక్ పేర్కొన్నారు. ఐఎంఎఫ్ ఆంక్షలు “ఇప్పుడు, డీజిల్ ధరలు 3-4 రెట్లు పెరగడంతో, మోటార్ సైకిల్ నడిపేవారికి సబ్సిడీని అందిస్తూ వారిని కాపాడుతూ, డీజిల్‌పై సుంకాన్ని సున్నాకు తగ్గించి, పూర్తి భారాన్ని పెట్రోల్‌పైకి మార్చాలని మేము నిర్ణయించుకున్నాము” అని ఆయన అన్నారు.

అయితే, ఐఎంఎఫ్ కట్టుబాటును ఉల్లంఘించవద్దని, అది మరింత తీవ్రమైన పరిణామాలకు దారితీయవచ్చని ఆయన హెచ్చరించారు. “మేము ఐఎంఎఫ్‌తో రహస్య చర్చలు జరిపి, లీటరుకు 80 రూపాయల సుంకాన్ని తగ్గించడానికి వారిని ఒప్పించాము” అని మాలిక్ తెలిపారు.