'ఇరాన్.. అదో తిక్కలోళ్ల దేశమంటూ' ట్రంప్ ఎద్దేవా!

మధ్యప్రాచ్యంలో అమెరికా–ఇరాన్ మధ్య కొనసాగుతున్న ఉద్రిక్తతలు మరోసారి ప్రపంచవ్యాప్తంగా ఆందోళనలను రేకెత్తిస్తున్నాయి. ప్రత్యక్ష యుద్ధంలో కాస్తంత విరామం ఉన్నప్పటికీ పరోక్ష ఘర్షణలు, ఆర్థిక ఆంక్షలు, దౌత్యపరమైన ఒత్తిళ్లు, పరస్పర దూషణ భూషణలు, దెప్పిపొడుపులు కలిసి పరిస్థితిని మరింత సంక్లిష్టం చేస్తున్నాయి.

అమెరికా మాజీ అధ్యక్షుడు డోనాల్డ్ ట్రంప్ “ఇరాన్ అణ్వాయుధాలు పొందకుండా అడ్డుకోవాలి” అని చేసిన వ్యాఖ్యలు ఉద్రిక్తతలను మరింత పెంచాయి. ఈ వ్యాఖ్యలు ప్రస్తుతం కొనసాగుతున్న జియోపాలిటికల్ ఉద్రిక్తతలకు మరింత ఊతమిచ్చాయి. ఆయన ఇరాన్ ను ఉద్దేశించి అదో పిచ్చివాళ్ల/తిక్కలోళ్ల దేశంగా అభివర్ణిస్తూ అటువంటి వాళ్ల దగ్గర అణ్వాయుధాలు లేకుండా చేస్తామని ప్రకటించారు.

ఈ సంక్షోభానికి కేంద్రంగా నిలిచింది హర్మోజ్ జలసంధి. ప్రపంచ చమురు సరఫరాలో కీలక పాత్ర పోషించే ఈ జలసంధిలో ఇరాన్ ట్రాఫిక్‌ను పరిమితం చేయడం వల్ల అంతర్జాతీయ ఆయిల్ మార్కెట్లపై తీవ్ర ప్రభావం పడింది. చమురు ధరలు పెరగడంతో గ్లోబల్ ఎకానమీపై ఒత్తిడి పెరిగింది.

ఇరాన్ ఒకవైపు ఆంక్షలు ఎత్తివేస్తే తాము కూడా సడలింపులు ఇవ్వడానికి సిద్ధమని సంకేతాలు ఇస్తుండగా, అమెరికా మాత్రం ఆ ప్రతిపాదనపై అప్రమత్తంగా ఉంది. ఇరాన్ ఉద్దేశాలపై అనుమానాలు వ్యక్తం చేస్తోంది.

ఇక ఈ ఉద్రిక్తతలు కేవలం అమెరికా–ఇరాన్ మధ్యకే పరిమితం కాలేదు. ఇజ్రాయెల్ సైన్యం దక్షిణ లెబనాన్‌లో ఆపరేషన్లు కొనసాగిస్తుండగా, హెజ్బుల్లా- ఇజ్రాయెల్ దళాలపై దాడులు చేపట్టింది. డ్రోన్ దాడులు, ఆర్టిలరీ దాడులు ప్రాంతీయ ఉద్రిక్తతలను మరింత పెంచుతున్నాయి.

అంతర్జాతీయ స్థాయిలో కూడా ఈ సంక్షోభం ప్రభావం స్పష్టంగా కనిపిస్తోంది. టెలికమ్యూనికేషన్ మౌలిక వసతులపై జరిగిన దాడులను అంతర్జాతీయ టెలీ కమ్యూనికేషన్ యూనియన్ ఖండించింది. గల్ఫ్ దేశాలు, జోర్డాన్ వంటి దేశాలు కూడా పరిస్థితిపై ఆందోళన వ్యక్తం చేస్తున్నాయి. పాశ్చాత్య దేశాల మధ్య కూడా ఈ అంశంపై విభేదాలు వెలుగులోకి వస్తున్నాయి.

మధ్యవర్తిత్వం చేస్తున్న దేశాలు ఈ సంక్షోభం దీర్ఘకాలిక స్థాయిలో కొనసాగవచ్చని హెచ్చరిస్తున్నాయి. తాత్కాలికంగా కాల్పులు ఆగినా, సమస్యల మూల కారణాలు ఇంకా పరిష్కారం కాలేదు.

ఇరాన్–అమెరికా మధ్య ఈ ఉద్రిక్తతలు కేవలం ప్రాంతీయ సమస్య కాకుండా, ప్రపంచ ఆర్థిక వ్యవస్థ, ఇంధన సరఫరా, అంతర్జాతీయ భద్రతపై ప్రభావం చూపుతున్నాయి. పరిస్థితి ఎప్పుడు మళ్లీ ఉద్రిక్తతలకు దారితీస్తుందో అనిశ్చితి నెలకొంది.