నేపాల్ గల్లంతు అయిన వారు ఐదు వేల మంది

ఇంకా ఆచూకీ లేకుండా మరో 5 వేల మంది ఉన్నారని, వారికోసం సహాయక చర్యలు కొనసాగుతున్నాయని అధికారులు తెలిపారు. జాతీయ విపత్తు ప్రమాద తగ్గింపు, నిర్వహణ అథారిటీ (ఎన్‌డీఆర్‌ఆర్‌ఎంఏ) ప్రకారం, చిత్వాన్ జిల్లా నుంచి కనీసం 364, తూర్పు నవల్‌పరాసి నుంచి 228, పశ్చిమ నవల్‌పరాసి నుంచి 222, నువాకోట్ నుంచి 198 మృతదేహాలు లభ్యమయ్యాయి. అదేవిధంగా, రసువా నుంచి 178, గోర్ఖా నుంచి 77, ధాడింగ్ నుంచి 70, తనాహు నుంచి 38 మృతదేహాలు లభ్యమైనట్లు ఆ సంస్థ పేర్కొంది.

ఖాట్మండులో చికిత్స పొందుతున్న ఇద్దరు వరద బాధితులు మరణించారు. గల్లంతైన వారి సంఖ్య 5,130గా అంచనా వేయగా, భద్రతా సిబ్బంది సంయుక్త దళం వారి కోసం గాలింపు, సహాయక చర్యలను కొనసాగిస్తోంది. ఇప్పటివరకు వరద ప్రభావిత ప్రాంతాల నుంచి 13,656 మందిని రక్షించారు. ఆగష్టు 26న నేపాల్-టిబెట్ సరిహద్దు సమీపంలో మంచు-రాతి హిమసంపాతం కారణంగా సంభవించిన ఆకస్మిక వరదలు, ఉత్తర, మధ్య నేపాల్‌లోని పట్టణాలు, గ్రామాలను నాశనం చేశాయి.

హిమాలయ సరిహద్దు ప్రాంతం నుంచి దక్షిణంగా ప్రవహించే భోటేకోశి నది, వరద నీటిని దిగువకు తీసుకువెళ్లి, ఇళ్లు, వాహనాలు, రోడ్లు, వంతెనలను కొట్టుకుపోయి, జలవిద్యుత్ ప్రాజెక్టులను దెబ్బతీసింది. చైనా మీడియా నివేదికల ప్రకారం, ఈ విపత్తులో చైనా వైపు కనీసం 43 మంది మరణించగా, టిబెట్‌లో 500 మందికి పైగా గల్లంతయ్యారు.