వైసీపీ ‘వెన్నుపోటు’ అస్త్రం! టీడీపీ అభివృద్ధి మంత్రం!! ఏది నిజం?

ఆంధ్రప్రదేశ్‌లో కూటమి ప్రభుత్వం (టీడీపీ-జనసేన-బీజేపీ) అధికారంలోకి వచ్చి రెండేళ్లు పూర్తయింది. రాష్ట్రంలో రాజకీయ వాతావరణం తీవ్ర చర్చనీయాంశంగా మారింది. ఒకవైపు తాము చేపడుతున్న పనులు ‘అభివృద్ధి మంత్రం’ అని ప్రభుత్వం చెప్తుండగా, మరోవైపు ఇచ్చిన హామీలను నెరవేర్చడంలో కూటమి విఫలమైందంటూ ప్రతిపక్ష వైసీపీ దీనిని ప్రజలకు జరిగిన ‘వెన్నుపోటు’గా అభివర్ణిస్తోంది. ఈ నేపథ్యంలో, ఈ రెండేళ్ల కాలంలో సూపర్ సిక్స్ పథకాల అమలు ఎంతవరకు జరిగింది? రాష్ట్ర ఆర్థిక పరిస్థితి, అప్పుల భారం ఎలా ఉంది? రాబోయే 2029 ఎన్నికల వ్యూహాల చుట్టూ ఇరు పార్టీల రాజకీయాలు ఎలా తిరుగుతున్నాయి అనే అంశాలపై సమగ్ర విశ్లేషణే ఇది.

కూటమి ప్రభుత్వం ఇచ్చిన హామీలను 'వన్ బై వన్' అమలు చేయడానికి ప్రయత్నిస్తోందని విశ్లేషకులు పేర్కొన్నారు. అయితే 'సూపర్ సిక్స్' పథకాల్లో కొన్ని ఇంకా పూర్తి స్థాయిలో అమలు కాలేదనే అసంతృప్తి ఉంది.

మహిళలకు ఉచిత బస్సు ప్రయాణం: ఈ పథకం నడుస్తున్నప్పటికీ, రాష్ట్రంలోని 16 రకాల బస్సులలో కేవలం 5 రకాల (ఆర్డినరీ) బస్సులకే దీనిని పరిమితం చేశారనే విమర్శ ఉంది.

అమలు కాని ప్రధాన హామీలు: 18 నుండి 50 ఏళ్ల మహిళలకు నెలకు ₹1,500 ఇచ్చే 'ఆడబిడ్డ నిధి', నిరుద్యోగ భృతి (నెలకు ₹3,000) వంటి కీలక హామీలు ఈ రెండేళ్లలో ఇంకా ప్రారంభం కాలేదని, దీని కోసం యువత, మహిళలు ఎదురుచూస్తున్నారని చర్చించారు.

అభివృద్ధి, పెట్టుబడులు..

కూటమి ప్రభుత్వం దాదాపు రూ. 2 లక్షల కోట్ల పెట్టుబడులు తెచ్చామని చెప్తున్నప్పటికీ, గూగుల్ డేటా సెంటర్ మినహా మిగిలిన కంపెనీల వివరాలను ప్రజల్లోకి స్పష్టంగా తీసుకెళ్లడంలో వెనుకబడిందనే అభిప్రాయం వ్యక్తమైంది.

పారిశ్రామిక రంగం, ఉపాధి కల్పన వంటి "ఇన్కమ్ జనరేషన్" (ఆదాయ వనరుల పెంపు) కార్యక్రమాల్లో ప్రభుత్వం ఆశించిన స్థాయిలో రాణించలేకపోయిందని విశ్లేషించారు.

ప్రతీకార రాజకీయాలు, 2029 ఎన్నికల వ్యూహం

ఏపీలో ప్రస్తుతం సాధారణ రాజకీయాల కంటే "ప్రతీకార రాజకీయాలు" ఎక్కువగా నడుస్తున్నాయని విశ్లేషకులు అభిప్రాయపడ్డారు. గత ప్రభుత్వంలో జరిగిన తప్పులపై కేసులు పెట్టడం, ఐఏఎస్/ఐపీఎస్ అధికారుల సస్పెన్షన్లు కొనసాగుతున్నాయి.

వైసీపీ ఆందోళనలు, భవిష్యత్తు కార్యాచరణ

ప్రభుత్వంపై వైసీపీ 'వెన్నుపోటు' పేరుతో చేస్తున్న ఆందోళనలు, పుస్తకాల విడుదల వారి రాజకీయ అస్తిత్వాన్ని (Existing) కాపాడుకోవడానికి చేస్తున్న ప్రయత్నంగా విశ్లేషించారు.

భూసేకరణకు వ్యతిరేకంగా ఉన్న అమరావతి రైతులకు మద్దతుగా వైఎస్ జగన్ రాబోయే రోజుల్లో రోడ్లపైకి వచ్చి పోరాడే అవకాశం ఉందని భావించారు

రాజకీయాల్లో రెండేళ్లు అనేది ప్రజల జీవితాలను పూర్తిగా మార్చడానికి సరిపోయే సమయం కాకపోయినా, ప్రజా ఆకాంక్షలను నెరవేర్చడానికి కీలకమైనది. సంక్షేమం, అభివృద్ధి రెండూ సమపాళ్లలో సాగినప్పుడే ప్రజల జీవితాలు బాగుపడతాయని, రాబోయే మూడేళ్లలో ఈ సమతుల్యతను ఎవరు సాధిస్తారనే దానిపైనే తదుపరి ఎన్నికల ఫలితాలు ఆధారపడి ఉంటాయని ఈ చర్చ సారాంశం.